Symudodd Dr Alan Parker i Fro Morgannwg yn 2013, gyda’i wraig a dau o blant. "Mae De Cymru yn lle croesawgar a fforddiadwy i fyw, gydag ansawdd bywyd gwych ac ysgolion da," meddai. “Mae gennym ni drefi llawn bwrlwm fel y Bont-faen a Phenarth ar garreg ein drws, yn ogystal â chefn gwlad hardd.
"Rwyf i a fy nheulu'n mwynhau cerdded ar hyd traethau Llwybr Arfordir Treftadaeth Morgannwg ger ein cartref, yn ogystal â mynd ar deithiau dydd a gwyliau byr yn Sir Benfro, Gŵyr a Pharc Cenedlaethol Bannau Brycheiniog. Dydym ni byth yn brin o lefydd i'w harchwilio; hyd heddiw, rwy'n dal i ddod o hyd i lwybrau troed a chaeau newydd yn agos at ein tŷ ni."
Pan nad yw’n gweithio gartref, mae Dr Parker yn cymudo i Ysgol Meddygaeth Prifysgol Caerdydd. Yno, mae'n cymryd rhan mewn ymchwil sy'n arwain y byd i frwydro yn erbyn canser gyda firysau a addaswyd yn enetig. Yn ystod pandemig COVID-19, roedd Dr Parker a'i dîm yn gallu defnyddio eu sgiliau a'u hadnoddau firoleg i helpu yn y ras i gynhyrchu brechlyn COVID-19.
"Pan ddywedwyd wrth bawb am aros adref, doeddem ni ddim yn gallu mynd i mewn i'r labordy i wneud ymchwil canser. Yn lle hynny, fe wnaethon ni wneud defnydd da o'n hamser; fe wnaeth pandemig y coronafeirws oedi rhai triniaethau canser a datblygiadau ymchwil, felly fe wnaethom bopeth a allem i helpu i ddod o hyd i frechlyn, a oedd yn ei dro yn golygu y gallem fynd yn ôl i wneud ein hymchwil canser yn gynt.
“Mae gennym ni fanc o filoedd o firysau rydyn ni’n eu defnyddio fel rhan o’n hymchwil canser, felly fe wnaethon ni edrych i mewn i ffyrdd o newid pa enynnau a fynegwyd er mwyn eu troi’n frechlynnau COVID-19. Rwy’n teimlo’n falch o’r hyn rydyn ni’n gallu ei wneud fel tîm sy'n arwain y byd o ran datblygu firotherapïau ar gyfer triniaeth canser, a sut rydym wedi gweithio gyda'n gilydd i roi Cymru ar y map o ran datblygu brechlynnau."
“Pan symudon ni i Sir Benfro, roedd hynny er mwyn y cydbwysedd rhwng bywyd a gwaith,” meddai Julian Rollins – newyddiadurwr, darlledwr ac awdur canllawiau cerdded i Sir Benfro, Sir Gaerfyrddin a Cheredigion. “Roeddwn i wedi bod yn Birmingham, a byddai fy nhaith yn y car ar yr M6 i’r gwaith yn aml yn cymryd dwy awr hir. Byddwn i'n cyrraedd adref ymhell ar ôl i'r plant fynd i’w gwely."
Tra’r oedd y plant yn yr ysgol roedd y teulu yn byw mewn pentref yn agos i lannau Bae Ceredigion yng Ngorllewin Cymru. "Y peth gorau oedd bod y môr tua 20 munud i ffwrdd: roedd mynd i'r traeth yn rhywbeth bob dydd. Pan oedd y plant yn ifanc roedden ni'n gallu eu codi nhw ar ddiwedd yr ysgol a mynd i nofio neu syrffio.
"Nawr, mae'r merched wedi tyfu i fyny ac wedi symud ymlaen. Rwy'n dal i fyw yn Sir Benfro, ond rydw i wedi ailffocysu fy sefyllfa waith fel nad ydw i'n gweithio neu’n ysgrifennu o gartref bob dydd. Mae gen i swydd addysgu rhan amser yn ne Sir Benfro, felly symudais i Ddoc Penfro er mwyn cael taith mwy synhwyrol. Dim ond 15 munud o ddrws i ddrws yw hi.
Mae gan fy nhŷ newydd olygfa o'r môr, sy'n wych. Rwy'n gweld y fferi i Iwerddon yn mynd a dod bob dydd. Pan dwi’n gwneud gwaith o gartref, mae’n dda gallu cymryd hoe drwy fynd â’r ci am dro ar hyd glan y môr a gwylio cychod yn mynd a dod.
Dychwelodd Lowri Williams i weithio ger ei dinas enedigol, Bangor, yng Ngogledd Orllewin Cymru. “Mae’r Gymraeg yn ganolog i fy mywyd a’m hunaniaeth,” meddai, “ac roedd yn bwysig i mi symud yn ôl i’r ardal lle treuliais fy mhlentyndod i fagu fy mab fy hun, ac i gyfrannu at y gymuned a’i dyfodol.
“Mae’n wych ein bod wedi ein hamgylchynu gan gymaint o weithgareddau awyr agored yn Ynys Môn ac Eryri – gallaf fod wrth fy nesg drwy’r dydd ac ar ben mynydd gyda’r nos, gyda golygfeydd godidog o’m cwmpas.”
Yng Nghymru, mae gallu cydbwyso gyrfa werth chweil a bywyd ysbrydoledig y tu allan i’r gweithle yn nod sy’n bosibl. Ar ochr waith yr hafaliad, gall hyd yn oed y daith ddyddiol i’r gwaith fod yn donig yn hytrach nag yn niwsans.
Mae'r rhai sy'n gyrru ddwywaith y dydd trwy Barc Cenedlaethol hardd Bannau Brycheiniog yn mwynhau golygfeydd llawer mwy ysbrydoledig na thu mewn i dwnnel Tiwb Llundain. Ac mae’n anodd dychmygu gwell olygfa foreol na thynnu i mewn i Lanelli ar yr hyn y mae’r Guardian wedi’i galw’n ‘rheilffordd fwyaf deniadol Ynysoedd Prydain’. Mae ein cysylltiadau trafnidiaeth yn dda, ac maent yn gwella. Ar y rhwydwaith rheilffyrdd, mae rhaglen o welliannau trylwyr yn bwriadu cwtogi amseroedd teithio, cynyddu gwasanaethau yn ystod yr wythnos a chyflwyno trenau a gorsafoedd newydd, dros y blynyddoedd i ddod.
I lawer sy’n symud i Gymru, mae’r posibilrwydd o gael bywyd teuluol gwell yn selio’r fargen. Mae ysgolion lleol wrth galon pob cymuned Gymraeg. Mae gan y genedl ei system addysg ei hun, sy'n wahanol i weddill y DU, ac mae Estyn - y corff sy'n cynnal safonau - wedi graddio 77% o'r holl ysgolion yn 'dda' neu'n 'rhagorol'. Mae pob plentyn yn cael y cyfle i ddysgu Cymraeg, neu i gael eu holl addysg yn yr iaith. Mae digon o gyfle i oedolion gael gafael ar y Gymraeg hefyd, o gyrsiau preswyl a dosbarthiadau nos i sesiynau ‘galw heibio’ anffurfiol mewn caffis lleol lle gallwch hogi eich sgiliau sgwrsio.
Mae Cymru yn lle amrywiol a chosmopolitan. Ein dathliad LHDT+ enwocaf yw Pride Cymru, sy'n canolbwyntio ar 'Y Penwythnos Mawr' yng Nghaerdydd. Mae’n gymysgedd bywiog a lliwgar o gerddoriaeth a gorymdeithiau stryd, gyda baner yr enfys yn chwifio’n falch o’r Castell i lawr i’r Bae. Yna mae Gŵyl Gwobr Iris – un o ddigwyddiadau ffilm LHDT+ mwyaf sefydledig Ewrop, gyda gŵyl chwe diwrnod yn y brifddinas a digwyddiadau allgymorth gydol y flwyddyn ledled y wlad.
Mae’r wyth prifysgol sydd gennym yn ymddangos yn rheolaidd yn agos at frig tablau cynghrair y DU am foddhad myfyrwyr, ac maent yn enwog ledled y byd am ragoriaeth academaidd ar draws ystod eang o bynciau."
Mae’r wyth prifysgol sydd gennym yn ymddangos yn rheolaidd yn agos at frig tablau cynghrair y DU am foddhad myfyrwyr, ac maent yn enwog ledled y byd am ragoriaeth academaidd ar draws ystod eang o bynciau. Mae hyn wedi denu myfyrwyr o dramor i astudio yma, gyda’r nifer bellach yn fwy na 19,000, yn dod o fwy na 170 o wledydd.
Yn wir, rydym ni’n genedl sy’n edrych allan i’r byd yn hy, diolch i gysylltiadau addysgol, busnes a diwylliannol hirhoedlog â chenhedloedd a rhanbarthau ledled y byd.
Mae ein prifddinas yn glytwaith o ddiwylliannau gwahanol. Dyma etifeddiaeth y cyfnod pan oedd glo a haearn yn tra-arglwyddiaethu, a Chaerdydd yn un o borthladdoedd mwyaf y byd. Byddai masnachwyr a morwyr o bob cenedl forwrol yn y byd yn dod i Tiger Bay i ennill bywoliaeth. Dewisodd miloedd ohonynt beidio â gadael wedyn, gan ddod yn falch o’u Cymreictod – ond gan drosglwyddo eu harferion a'u diwylliant unigryw i’w plant hefyd
Ceir cymunedau sefydlog yng Nghymru o bobl o sawl gwlad, a’r grwpiau amlycaf yw pobl o India, Iwerddon a China. Mae’n gyfnewidfa ddiwylliannol ddeuol: bydd dathliadau Dydd Gŵyl Dewi bellach yn digwydd yn Chongqing, yn yr un modd ag y nodir Blwyddyn Newydd China yn ein gwlad ni.
Mae Cymru’n lle i fyw ynddo, nid i ddod ar wyliau’n unig: cenedl fodern â thirwedd amrywiol o ran economi, diwylliant a hamdden, gan wneud gweithio, gorffwyso a chwarae’n beth hawdd iawn i’w fwynhau.
